A nossa REDE BASCA VERMELHA oferece desde o
mês de Agosto de 1998 conteúdos na vossa língua. É-nos possível pô-los ao vosso dispor mercê da colaboraçom que nos chega desde a Galiza. Se calhar, sendo do Brasil, Angola, ou mesmo de Portugal, nom conheces nem a problemática lingüístico-nacional desse povo, nem porventura a sua situaçom física na Europa. Por isso acrescentamos um mapa situacional e umhas linhas explicativas:
-
A Galiza, conhecida polos romanos com o nome de Gallaecia, foi historicamente a primeira naçom da Europa em constituir-se em Reino soberano (ano 410, século V), muito antes do que outras como Castela ou Portugal. Mantivo durante séculos a sua "homologaçom" com outros reinos do mesmo continente, com umha cultura rica exprimida em língua galega e reflectida por exemplo na sua lírica medieval. No século XII, um pedaço da Galiza independizou-se constituindo o reino de Portugal. Este facto fijo do galego língua do novo reino português. Com o tempo, o imperialismo castelhano (=espanhol) fijo que a Galiza se visse submetida, perdendo de facto a sua soberania no século XV sob o poder militar dos Reis Católicos, que impugérom o idioma espanhol, ficando o galego marginalizado nos ámbitos rurais humildes e banido dos usos formais e da administraçom. Enquanto isso, Portugal convertia-se em estado imperialista possante na cena mundial, levando o galego polo mundo sob o nome de português.
Contudo, os estudos filológicos reconhecem a manutençom da identidade da língua falada a Norte e Sul do rio Minho. O movimento nacionalista galego moderno, que parte do século XIX e salienta polo seu carácter progressista, sempre reivindicou este facto e na actualidade aposta polo REINTEGRACIONISMO, ou reencontro substancial no padrom entre a fala da Galiza e a dos países de expressom portuguesa. Face a esta posiçom, o poder espanhol, que sempre procurou a eliminaçom do nosso idioma nacional, hoje pretende defender um suposto "idioma independente", reprimindo o professorado reintegracionista e rechaçando qualquer subsídio ou escrito acorde com este princípio. Esta táctica nom é nova; foi aplicada polos russos na Moldávia, os franceses na Córsega ou os belgas na Flandres, e sempre procurou afastar as variantes fracas do tronco histórico mais viçoso.
No nosso caso, os nacionalistas e independentistas galegos (homens e mulheres) luitamos porque se reconheça a identidade lingüística galego-luso-brasileira-Palop’s e a nossa inclusom na C.P.L.P. É, para a nossa naçom, tam importante como conseguir a recuperaçom total dos usos sociais na nossa língua, que nós nomeamos indistintamente galego (nome mais popular), galego-português, ou português da Galiza. Como comprovarás, as diferenças com as outras variantes do português no mundo som muito pequenas.
É fundamental para a Galiza contarmos com o apoio das pessoas e organizaçons progressistas dos países de língua oficial portuguesa. Por isso, para além de achegar-te a informaçom específica da REDE BASCA VERMELHA na tua/nossa língua, estas páginas querem servir para fazer um apelo à tua solidariedade com a causa da Galiza, que como vês nom é alheia aos mais de 200 milhons de habitantes lusófonos do mundo. Recomendamos-te, ainda, a visita de outras páginas relacionadas com a Galiza e a sua língua como som estas:
Liberdade para a Galiza
